Германияда марҳум россиялик муҳолифатчи сиёсатчи Борис Немцов номида жамғарма ташкил этилди, деб хабар бермоқда сиёсатчининг қизи Жанна Немцова ўзининг фейсбукдаги саҳифасида.

“Германияда озодлик учун Борис Немцовнинг жамғармаси яратилди. Жамғарманинг ижрочи директори Ольга Шорина бўлади”, деб ёзди Жанна Немцова.

Жанна Немцованинг айтишича, Шорина узоқ вақт давомида отасининг “ўнг қўли” ва фикрдоши бўлган.

“Жамғарманинг вазифаси отамнинг ишини Германия ва Россия қонунчилигига тўлиқ мосликда давом эттиришдан иборат. Жамғарманинг фаолияти менинг давлатим эркин бўладиган лаҳзаларни яқинлаштиради, деб умид қиламан. Ва биз яна ватанимизга қайта оламиз”, деб ёзди Немцова.

Аввалроқ Немцовнинг қизи унга билдирилаётган таҳдидлар туфайли хорижга кетгани маълум қилинганди.

Борис Немцов жорий йилнинг 28 февралида кечки пайт Москва марказидаги Катта Москва кўпригида отиб кетилган.