“Маърифат” газетасининг навбатдаги сонида чоп этилган мақолада мактаб ўқитувчиларининг савияси ва билим даражаси шубҳа остига олинган.
“Афсуски, айрим педагоглар мактаб дарслигига киритилган ўзбек ёзувчилари ҳақидаги оддий саволларга жавоб бера олмайди. Хориж адабиёти ҳақида гапирмасаям бўлади”, - дейилади материалда.

Муаллифнинг фикрича, бундай савиядаги педагоглар ўқувчиларга ҳам тузукроқ билим бера олмайди, бунинг натижасида эса билимсиз кадрлар кўпайиб кетади.
Шу газетадаги яна бир мақолада касб-ҳунар коллежларига ўрнатилган ускуналар узоқ йиллардан буён ишлатилмаётганини, у педагогик жараёнга жалб қилиниб, ёшларнинг билим олишига хизмат қилмаётгани таъкидлаб ўтилди.

Муаллиф Касби туман қишлоқ ва сув хўжалиги касб-ҳунар коллежини мисол қилиб келтиради. Айтилишича, у ерга зарурий асбоб-анжомлар 2004 йилда Италиянинг қишлоқ хўжалиги маҳсулотларини қайта ишловчи компанияларидан бири томонидан етказиб берилган, лекин 11 йилдан буён улар қўлланилмайди, ўқитувчиларнинг ўзлари ҳам ушбу аппаратуранинг қўлланилиши борасида назарий маълумотга эга, холос.