Ўзбекистонда 1 декабрдан республиканинг божхона чегарасидан автомобиль транспорти билан олиб ўтилаётган маҳсулотлар ҳақида дастлабки электрон ахборот бериш тизими киритилмоқда. Бу ҳақда 9 ноябрда эълон қилинган Вазирлар Маҳкамаси қарорида айтилмоқда.   

Қарорга кўра, юк ташувчилар, божхона брокерлари ёки бошқа манфаатдор шахсларга 2015 йил 1 декабрдан давлат божхона хизматига божхона чегарасидан автомобиль транспорти билан олиб ўтилаётган (жумладан транзит шартлари билан) маҳсулотлар ҳақида дастлабки электрон ахборот бериш ҳуқуқи берилади.

Ўзбекистон Давлат божхона қўмитасида янги тизим ташқи иқтисодий фаолият иштирокчиларига ўз хоҳишларига кўра маҳсулотни расмийлаштириш жараёнини тезлатиш ва божхона муассасалари билан ўзаро муносабатни соддалаштиришга имкон бериши айтилди. 

Маҳсулот ҳақида дастлабки электрон ахборот мавжудлии ва уларнинг маҳсулотга бириктирилган ҳужжатларга мослиги шартида божхона назорати ва расмийлаштириши божхона хизмати муассасаларига маҳсулотга бириктирилган ҳужжатлар тақдим қилингандан кейин бир соат ичида амалга оширилади.