Ўзбекистон миллий терма жамоаси 12 ноябрь куни Жаҳон чемпионати-2018 иккинчи саралаш босқичи H гуруҳи 7-тур ўйинлари доирасида КХДР термасига қарши баҳс юритади.

Айни кунларда Самвел Бабаян устозлигидаги бош жамоа Тошкентда йиғин ўтказмоқда. Йиғиннинг дастлабки тўрт кунида асосан миллий чемпионатда тўп сураётган футболчилар билан машғулотлар ўтказилаётган, терма жамоа ихтиёрига легионерлардан фақат Азизбек Ҳайдаров, Анзур Исмоилов, Сервер Жепаров ва Фозил Мусаев етиб келишган эди.

Sports.uz нашрининг маълум қилишича, Ўзбекистон терма жамоаси бугундан тўлиқ таркиб билан машғулот ўтказади. Қатарнинг “Ал Жайиш” жамоаси шарафини ҳимоя қилаётган Сардор Рашидов ҳам 8 ноябрь куни бош жамоа қароргоҳига етиб келди ва бугундан машғулотларга қўшилди.

Таъкидлаб ўтиш керакки, Сардор Рашидов Қатар Юлдузлар Лигасининг 8-тур ўйинида “Ал Месаимер” клуби дарвозасини икки бор ишғол қилди ва терма жамоа ихтиёрига яхши кайфиятда етиб келди.