Нью-Йорк шаҳрида ўзларининг 11 ойлик чақалоғини меҳмонхонада қаровсиз қолдириб, ресторанга ичкилик ичиш мақсадида жўнаб кетган жуфтлик ҳибсга олинди. Бу ҳақда NY Daily News нашри хабар тарқатди.

Хабарда айтилишича, 28 ёшли Женна Ролиф ва 31 ёшли Дуглас Лопес ўзларининг қизалоқлари олдига маст ҳолда қайтиб келишган. Улар бир ярим соат давомида чақалоқни қаровсиз қолдиришганди.

Ушбу ёшлар чақалоқнинг ҳаётига таҳдид солганликда айбланиб, қамоққа олинишган.

Полиция маълумотида айтилишича, улар меҳмонхонага қайтишганида қаттиқ маст бўлишган ва улар бу аҳволда чақалоқнинг хавфсизлигига таҳдид солишган. Улар хонага қайтишганида чақалоқ очиқ дераза яқинидаги кароватда ётган бўлган.

Женна Ролиф нашрга берган интервьюсида бу иш туфайли виждон азобида эканини айтиб ўтган.

У қамоқдан чиқарилгач, ўз чақалоғи билан бирга тушган видеосини оммага намойиш қилди.

"Она ва бола ўртасидаги меҳрдан кучлироқ меҳр йўқ бу дунёда. Сен ҳамиша менинг қизим бўлиб қоласан. Сени бутун борлиғим билан севаман", дейди у.

Қайд этилишича, Ролиф хоним ўша вақтда алкагол туфайли маст бўлиб қолгани ҳақидаги маълумотни инкор қилган.

"Биз Дуглас билан оз миқдорда ичган эдик", дейди у.

Айни вақтда унинг йигити Дуглас Лопес қамоқхонада қолмоқда.