Саудия Арабистонида эфиопиялик энага 3 ёшли боланинг бошини олишга ҳаракат қилганида қўлга олинди. Бу ҳақда GulfNews хабар қилмоқда.

Айтилишича, энага бу хонадонга ишга ёлланганига 5 кун бўлган. Ўша куни аёл ухлаб ётган боланинг бошини пичоқ ёрдамида кесиб олмоқчи бўлган. Бола йиғлай бошлаганида аёл унинг юзига шапалоқ тортиб юборган.

Бир неча дақиқадан сўнг боланинг онаси келиб қолиб, энага ташланган ва унинг қўлидан пичоқни тортиб олишга интилган. Бир муддатдан сўнг она энагани зарарсизлантирган. Сўнг болани олиб кўчага чиқиб кетган ва одамлардан ёрдам сўраган. Ҳайдовчилардан бири уларни шифохонага элтиб қўйган, у ерда болага тегишли тиббий ёрдам кўрсатилган. Жиноят жума кечаси ар-Риёдда содир бўлган.

“Боланинг тирик қолгани мўъжизадир, - деди жабрланувчининг қариндоши. – Энага уни ўлдиришга ҳаракат қилган, томоғи ва оғзига, қулоғи ва елкаларига урган. Шунингдек, орқасига икки марта урган. Аёл боласини қутқариш учун хонасига кирганида энага “ўлим, ўлим” деб пичирлаётган эди. Аёл боласини олиб чиққанида унинг усти-боши қон бўлиб кетган. Бир яхши инсон уни қирол Абдулла номли шифохонага элтиб қўйди, у ерда боланинг ҳаёти сақлаб қолинди”.

Айтилишича, энаганинг ақли жойида эмаслиги боис у жиноий жавобгарликка тортилмай қолиши мумкин. Айни пайтда, у махсус муассасада сақланиб, болалар тарбиясига бундан буён жалб қилинмаслиги тайин.