Туркия Сурия томондан хавф солингудек бўлса, ўзининг хавфсизлигини ҳаво ва ердан туриб таъминлашга тайёр. Бу ҳақда Туркия бош вазири Аҳмет Довудўғлу ТРТ телеканали эфирида айтди.

“Агар Сурия томондан Туркияга нимадир хавф солса, биз мос равишда жавоб берамиз. Биз ер ва ҳаводан туриб ҳимояланамиз. Агар Сурия инқирозини ҳал қилиш бўйича стратегия ишлаб чиқилса ва унинг амалга оширилишида БМТ ва ҳамма давлатлар иштирок этса, унда биз ҳам бу жараёнга қўшиламиз”, деб айтди Довудўғлу.

Бундан ташқари, Довудўғлу Сурия инқирозини ҳал қилиш масаласини АҚШ президенти Барак Обама билан муҳокама қилди. Томонлар “ИШИДга қарши курашиш бўйича Туркия фаолроқ роль ўйнаши керак бўлган янги стратегия зарур” деган фикрга келдилар.

Туркия бош вазири Курдистон ишчи партияси жангарилари ва бошқа экстремистик гуруҳлар билан кураш борасида гапирар экан, “кураш мамлакат бу элементлардан тўлиқ тозалангунча давом этади”, деб айтди. “ИШИД ва Курдистон ишчи партияси билан кураш ўртасида ҳеч қандай фарқ йўқ. Биз ҳеч қачон бирорта ҳам террорчилик гуруҳига бепарво қарамаганмиз. Сурияда ҳам гап фақат ИШИДда эмас. Агар Сурияда ИШИДни йўқ қилиб, инқирознинг ўзи ҳал қилинмаса, у ерда бошқа гуруҳ пайдо бўлиши мумкин”, деб айтди Аҳмет Довудўғлу.