Туркиянинг Измир шаҳри жандармерияси Курдистон ишчи партиясининг 3 нафар жангарисини қўлга олди. NTV телеканалининг хабар қилишича, террорчилар ёнидан 17 кг пластик портловчи моддалар топилган.

Айтилишича, партиянинг Измир ячейкаси аъзоси бўлган 36 ёшли Иброҳим исмли шахс бир муддат аввал кузатила бошланган. Бугун эрталаб эса у 2 нафар шериги билан ўрмон массивида ерга кўмилган портловчи моддани қазиб олаётганида қўлга олинган.

Хабар қилинишича, жангарилар Мустафо Камол Отатурк хотираси куни (10 ноябр) қўпорувчилик ҳаракати уюштиришни режалаштиришган.