ИШИД жангарилари томонидан бошқа дин вакилларига нисбатан шафқатсизлик билан муносабатда бўлаётгани сабабли яқин ўн йилликда Яқин Шарқдаги бир қатор мамлакатларда христиан дини тўлиқ йўқ бўлиб кетиши мумкин, дея ёзмоқда The Independent нашри.

Ўтказилган тадқиқот натижасига кўра, минтақада охирги икки йил ичида диний сабабларга кўра насроний динига мансуб кишилар сони кескин камайди. Айниқса, жангарилар фаол ҳаракат олиб бораётган Ироқ, Сурия ва Нигерияда улар сони қуйи даражага тушиб кетди.

Таҳлилчилар маълумотларига кўра, Шимолий Корея сингари мамлакатлардаги ҳолат, шунингдек, турли диний йўналишдаги экстремистлар хатти-ҳаракатлари ҳам христианликнинг йўқолишида катта рол ўйнамоқда.

Тадқиқотчиларнинг айтишича, айни пайтда Ироқда 275 минг атрофида христианлар ҳаёт кечирмоқда. Улар яқин беш йил ичида бутунлай қолмаслиги мумкин. Айни пайтда, қўшни Сурияда тўрт йил муқаддам христианлар сони 1,25 миллион нафарни ташкил этган бўлса, бугунги кунга келиб 500 мингга қадар камайди.