Кеча, 10 ноябрь куни Ўзбекистон президенти Ислом Каримов Россиянинг ЛУКОЙЛ компанияси раҳбари Вагит Алекперов билан ушбу компания мамлакат ҳудудида амалга ошираётган лойиҳалар реализациясини муҳокама қилди. Бу ҳақда президент матбуот хизмати хабар тарқатди.

Ўзбекистон етакчиси компаниянинг мамлакат нефть-газ секторидаги лойиҳалардаги фаол иштирокини қайд қилиб ўтди. Жумладан, компаниянинг Ўзбекистондаги лойиҳаларга йўналтирган инвестициялари 5 млрд доллардан ошгани таъкидланди.

Айни пайтда ЛУКОЙЛ республикада 3та лойиҳа устида ишламоқда: Қандим-Ҳавзак-Шоди; Жануби-Ғарбий Ҳисор конларини ишлатмоқда, шунингдек, Орол денгизининг Ўзбекистонга тегишли қисмида халқаро консорциум таркибида геологик разведка ишларини амалга оширмоқда.

Дастлабки 2 лойиҳа доирасида компания 2020 йилга келиб 18 млрд кубометр газ қазиб олишни, инвестициялар ҳажмини эса 8 млрд долларга етказишни режалаштирмоқда. Айни пайтда компаниянинг Ўзбекистонда чиқарган газ ҳажми 30 млрд кубометрдан ошиб кетди.

“Алекперов ЛУКОЙЛ Ўзбекистон нефть-газ секторида амалга оширилаётган барча инвестицион лойиҳалар доирасида ўз зиммасига олган мажбуриятларнинг кенг миқёсда ўз вақтида ижро этилишини таъминлаб беришини таъкидлаб ўтди”, - дейилади хабарномада.

Шунингдек, учрашув давомида ўзаро ҳамкорликнинг кейинги истиқболлари муҳокама қилинди.