Европанинг бир қатор давлатлари томонидан Мисрга учиши керак бўлган авиарейсларнинг бекор қилингани мамлакат иқтисодиётига бир ой ичида 273 миллион доллар зарар етказиши мумкин. Бу ҳақда 11 ноябрь куни республика Туризм вазирлиги хабар қилди.

Хусусан, 10 ноябрь куни Туркиянинг Turkish Airlines авиакомпанияси Шарм-аш-Шейхга бўладиган парвозларни 16 ноябрга қадар бекор қилган эди. Шунингдек, Франциянинг Air France ва Германиянинг Lufthansa авиакомпаниялари ҳам бир қатор рейсларни тўхтатди.

Эслатиб ўтамиз, 2015 йилнинг 31 октябрь куни Россиянинг "Когалимавиа" авиакомпаниясига тегишли Airbus-321 лайнери парвозга кўтарилгандан 23 дақиқа ўтиб ҳалокатга учраган эди. Мазкур самолёт бортидаги 217 нафар йўловчи ва етти нафар экипаж аъзосининг барчаси ҳалок бўлди.