Москва полицияси экстремизм хавфи туфайли кучайтирилган тартибда ишламоқда, деб хабар бермоқда “Интерфакс” ахборот агентлиги. 

Бу ҳақда Россия Ички ишлар вазирлигининг Москва бўйича бош бошқармаси бошлиғи Анатолий Якунин “Россия 24” телеканали эфирида айтиб ўтди.

Унинг айтишича, Москва ички ишлар идоралари иши “турли манбалардан келиб тушаётган” хавфлар сабабли кучайтирилган.

“Биз саноат ҳудудлари, бозорлар ва хорижликлар ҳамда экстремистик фаолият сабабли қизиқиш уйғотувчи бошқа шахслар бўлиши мумкин бўлган жойларни текширмоқдамиз”, деб айтди Якунин.

Ҳуқуқ-тартибот муассасаларининг кучайтирилган иш тартиби унинг бекор қилиниши ҳақида буйруқ бўлмагунча давом этади.

Якуниннинг таъкидлашича, ушбу ишлар жамоат транспортида хавфсизлик чораларини кучайтиришни ҳам ўз ичига олади. Бундан ташқари, Москва вилояти полицияси билан ўзаро ҳамкорлик йўлга қўйилган.

Аввалроқ Москвада теракт уюштирмоқчи бўлган уч киши қўлга олингани маълум қилинганди.