АҚШнинг ракета ҳужумига қарши мудофаа тизимининг кенгайтирилиши бошқа ядровий давлатлар, авваламбор Россиянинг стратегик ядровий салоҳиятини нейтраллаштиришдан иборат, деб айтди Россия президенти Владимир Путин. Бу ҳақда ТАСС ахборот агентлиги маълум қилди.

“Биз бир неча бор таъкидлаганмиз, биз бундай ҳаракатларни ракета-ядровий қуролланиш соҳасидаги тенгликка раҳна солишга уринишдек баҳолаймиз. Моҳиятан, бу уринишлар бутун глобал ва минтақавий барқарорликни издан чиқаришга уринишлардир”, деб айтди Путин Россия Қуролли кучларини ривожлантириш бўйича ўтказилган мажлисда.

“Эрон ва Шимолий Корея ядровий хавфларига ишора қилиш АҚШнинг асл мақсадларини яширади. Асл мақсад эса АҚШ ва унинг иттифоқчиларидан ташқари бошқа ядровий давлатлар, авваламбор Россиянинг стратегик ядровий салоҳиятини нейтраллаштиришдан иборат”, деб айтди Путин.

Путиннинг айтишича, Россия исталган ракета ҳужумига қарши мудофаа тизимидан ўта оладиган зарба берувчи тизимларни ривожлантиради.