Охирги пайтларда қўшни Қирғизистонда тўй кортежларини яратишда ўзига хос мода пайдо бўлди. Илгари турли-туман машиналарда келиннинг уйига келиш одат бўлган бўлса, эндиликда ёш йигитлар отларга қизиқиш билдирмоқда.

Маҳаллий матбуотда ёзилишича, Ўш вилояти Олой туманининг Жўшўлу овулида Абдумажит ўғли Адис ва Мусо қизи Айнагул қимматбаҳо машиналардан воз кечишга қарор қилишган. Ўша туманнинг Сари Мўғўл овулида ёш келин-куёв Таалай ва Уулчалар ҳам уларнинг изидан бориб, никоҳга тулпорларда йўл олишган.

Бундай ҳодисалар мамлакатнинг турли бурчакларида июнь ойидан буён кузатиб келинмоқда. Бу тўй маросимларининг интернетга жойлаштирган суратлари катта қизиқиш уйғотмоқда.