"Бавария"нинг икки етакчи футболчиси Арьен Роббен ва Роберт Левандовски ўртасида машғулот вақтида зиддиятли вазият юз берди. Бу ҳақда Sport Bild нашри хабар тарқатган.

Хабар қилинишича, машғулот вақтида польшалик ҳужумчи Роберт Левандовски Роббенни худбинликда айблаб, ўзига тўп оширмагани учун унга бақирган.

Машғулотдан кейин ундан журналистлар бу ҳаракати учун изоҳ сўрашганида, польшалик футболчи бу масалани очиқ қолдирган ва "Барчасини ўзингиз кўрдингиз", дея жавоб қайтарган.

Шунингдек, "Бавария" жамоасининг спорт ишлари бўйича директори Матиас Заммер бу ҳодиса юзасидан изоҳ берган ва айтишга арзигулик муаммо йўқлигини, ички муҳит жойидалигини айтган.

"Ҳеч қандай муаммо йўқ. Футболчилар баъзида қизишиб туришади. Умуман, барчада шундай бўлади", дея жавоб берган Заммер шу ҳолат юзасидан берилган саволга.