Бугун Ўзбекистон - КХДР учрашуви олдидан матбуот анжумани ўтказилди ва унда Самвел Бабаян ҳамда Ислом Тўхтахўжаев иштирок этишди.

"Эртага жуда муҳим ўйин кутиб турибди. Рақиб гуруҳда биринчи ўринда бормоқда. Жуда кучли ва ҳурматга лойиқ жамоа. Биз КХДРнинг кучли томонларини ўрганиб чиқдик. Эртага ўзимизнинг энг яхши ўйинимизни кўрсатиб ғалабага эришишга ҳаракат қиламиз. КХДРга қарши муҳим ўйин кутиб турибди, шу боис барча мухлисларни стадионга чорлаб қоламиз", - деб гап бошлади Самвел Бабаян. 

У ўйин қайдномасига киритиладиган 18 нафар футболчи номига ойдинлик киритиб олмагани ҳақида айтиб ўтган.

Шунингдек, у ўз жавобида бўлажак ўйин натижасига об-ҳаво шароити таъсир кўрсатмаслиги ҳақида айтган.

"Йўқ. Филиппиндаги ўйинда кўрган бўлсангиз жуда кучли ёмғирда ўйнагандик. Шу боис бу борада муаммо бўлмайди", дея жавоб қилади Бабаян шу хусусдаги саволга.

Терма жамоа бош мураббийи легионерлар, хусусан ўтган ҳафтада Россия чемпионатида муҳим ўйинларда иштирок этган Одил Аҳмедов ва Виталий Денисов Тошкентдаги ўйинга тайёр ҳолатда етиб келгани, уларда чарчоқ аломати йўқлигини маълум қилган.

"Бу иккала футболчи профессионал ҳисобланади. Тикланиш учун орада вақт бўлди. Эртага майдонга тушиб ўзларини кўрсатишларига ишонаман", дейди мураббий.

Анжумандан сўнг Самвел Бабаян қисқача тилак билдирди.

"Эртага жуда муҳим ўйин бўлади, бу ўйинда стадионга келиб, жамоани қўллашингизни сўрайман", дейди у.