Карнеги-Меллон университети олимлари ва Disney мутахассислари одам қўлидаги буюм металл буюм ёки электр асбоб эканлигини аниқлай оладиган “ақлли” соатлар прототипини ишлаб чиқдилар, деб маълум қилинмоқда Disney Research берган баёнотда.

Одам металл буюм ёки электр асбобга текканда “ақлли” соатлар буюмнинг турини аниқлайди ва унинг номини соат экранига чиқаради. Бунда одам ўзига хос антенна вазифасини бажаради.

Лойиҳа муаллифлари ушбу ишланмадан маълумотни соат экранига чиқаришда фойдаланишни таклиф қилмоқдалар. Мисол учун, агар одам ишлаётган 3D-принтерга тегса, унда “ақлли” соат экранига буюмни босиб чиқаришга кетадиган вақт ҳақида маълумот чиқарилади. Ёки мотоциклни аниқлаганда соат энг мақбул йўналишни таклиф қилиши мумкин.