Американинг Apple корпорацияси 2016 йилда смартфонлар ёрдамида бир лаҳзада пул маблағларини бошқа ҳисобларга ўтказиш ёки харидларни амалга оширишга имкон берадиган мобил иловани тақдим этиши мумкин. Бу ҳақда 11 ноябрь куни The Wall Street Journal журналининг электрон кўринишида эълон қилинган мақолада сўз боради.

Нашр ахборот манбасининг сўзларига кўра, айни пайтда корпорация Америка молия компаниялари билан иловани яратишда ҳамкорлик қилиш бўйича музокаралар олиб бормоқда. Жумладан, JP Morgan Chase, Capital One Financial, Wells Fargo ва U.S Bancorp сингари молия тузилмалари билан маслаҳатлашувлар олиб борилмоқда.

Янги тизимнинг техник жиҳатлари тўғрисидаги батафсил маълумотлар ҳозирча ошкор қилингани йўқ. Бироқ, мақолада келтирилишича, хизмат Apple томонидан ишлаб чиқарилган қурилмалар фойдаланувчиларига нақт пул ва банк карталарисиз лаҳзалар ичида тўлов қилиш ёки пул маблағларини бошқа ҳисобга ўтказишга имкон бериши керак.

Тахминларга кўра, илова Apple pay номини оладиган компания тўлов тизими билан боғланиши мумкин. The Wall Street Journal`нинг қайд этишича, корпорация янги хизматни ишга туширса, шу сингари иловалар, жумладан, PayPal тўлов тизимининг Venmo мобил иловаси билан кучли рақобатга киришади.