Бразилия терма жамоаси бош мураббийи Дунга Аргентина терма жамоасига қарши ЖЧ-2018 саралаши доирасида ўтказиладиган учрашува олдидан журналистлар билан гаплашди ва ўз интервьюсида Неймар дунёнинг энг яхши ҳужумчиси эканини айтиб ўтди.

Бразилиялик мутахассиснинг сўзларига кўра, Неймар сўнгги вақтда ўйинини сезиларли даражада ўстиришга эришган.

"Неймарнинг "Вильярреал" дарвозасига урган голини кўрганимда, "нега терма жамоа сафида ҳам шундай чиройли голлардан урмайди" дея ўйлаб қолдим. Ҳазил. Неймар ажойиб футболчи. У терма жамоа учун ҳамиша зарур футболчи. У Аргентина билан ўйинда чиройли бўлмасада, гол уришини истайман.

Неймар “Барселона”да кундан-кунга ўйинини ривожлантириб бораяпти. Неймар танқидчиларнинг оғзини ёпиб, "Барселона"да Мессисиз ҳам яхши ўйнай олишини исботлади. Кимлардир унинг салоҳиятини ерга уришга интилганди. Аммо ҳеч кимни афсонавий Пеле билан таққослаб бўлмайди. У – истисно.

Айтиш мумкинки, айни вақтда у Криштиану Роналдудан ҳам Лионель Мессидан ҳам ўзиб кетган. Буни унинг статистикаси ва рақамлар орқали тасдиқлаш мумкин. У жуда фойдали ўйнаяпти. Мессининг жароҳати бор. Криштиану Роналду ўтган йилги сермаҳсуллини кўрсата олмаяпти.

Аргентина билан бўладиган ўйин учун таркибни аниқлаб олдим. Бразилия терма жамоасидаги футболчилар бразил халқининг ўз фарзандлари. Халқ ўз фарзандларига жаҳл қилмаслиги керак. Футболчилар ҳамиша ўзларини ҳақиқий бразилияликлар сифатида ҳис қилиб ўйнашади", – дейди Дунга.

Маълумот учун, 23 ёшли Неймар жорий мавсумда Ла Лиганинг 10та ўйинида майдонга тушиб, 11та гол урди.