Microsoft компанияси фотосуратдаги одамнинг юз ифодасини аниқлай оладиган алгоритм имкониятларини синаб кўриш учун унга демонстрацион киришни очди.

Юз ифодасини таҳлил қилиш учун суратни хизматга юклаш керак бўлади. Хизмат деярли бир зумда статистик маълумотларни чиқариб, унда қайси юз ифодасининг эҳтимоли кўпроқ экани фоиз нисбатида ҳисоблаб чиқилган бўлади. Алгоритм жаҳл, нафратланиш, жирканиш, қўрқув, беэътиборлик, қайғу, ҳайрат ва қувонч юз ифодаларини аниқлай олади.

Дастур камерага тўғри қараб турган юзларни аниқ аниқлай олади. Бироқ дастур муаллифларининг огоҳлантиришича, бу тажриба маҳсулоти бўлиб, янглишиши мумкин. Шунингдек, ўлчами 36х36 пикселдан кам бўлмаган ва ҳажми 4 Мбдан кўп бўлмаган тасвирларни юклаш тавсия қилинади.

Алгоритм Project Oxford тадбири доирасида тақдим қилинди.