Россия авиакомпаниялари Мисрга парвозлар тўхтатилгани туфайли кўрадиган зиёнлари жорий йилнинг ўзида 9,1 млрд рублни ташкил қилади, деб хабар бермоқда Ҳаво транспорти эксплуатантлари уюшмаси президенти Владимир Тасунга иқтибос келтирган ҳолда ТАСС ахборот агентлиги.

“Уюшмага кирувчи авиакомпанияларнинг ўзигина кўрадиган зиён 9,1 млрд рублни ташкил қилади. Мисол учун, Мисрга парвозлар тўхтатилиши туфайли “Уральские авиалинии” компаниясининг молиявий йўқотишлари 700 млн рублни ташкил қилади. Шунингдек, “Оренбургские авиалинии” 800 млн, “Северный ветер” (Nord Wind) — 4 млрд рубль, “Икар” — 812 млн рубль, “Ямал” — 324 млн рубль, Red Wings — 480 млн рубль, «Таймир» — 232 млн рубль зиён кўради. Чартер рейслар амалга оширувчи авиакомпаниялар энг кўп зарар кўради. “Аэрофлот”нинг зиёни тахминан 60 млн рублни ташкил қилади”, деб айтди Тасун.

Россиянинг 20 га яқин етакчи авиакомпанияси Ҳаво транспорти эксплуатантлари уюшмаси аъзолари ҳисобланади. Бу авиакомпаниялар Россиядаги барча авиаташувларнинг 80 фоиздан кўпроғини таъминлайдилар.

Аввалроқ Россия туроператорлари уюшмаси Россия сайёҳлик бизнеси Миср билан боғлиқ вазият туфайли 200 млн долларгача зарар кўришини маълум қилганди.