Тошкентда истиқомат қилиб келган сурхондарёлик Сарвар Жумаев қишлоқдоши Турсунбой Қўчқоровнинг пулларини талончилик билан олиб қўйишда айбланиб ҳибсга олинди. Бу ҳақда “Постда” нашри хабар бермоқда.
Айтилишича, Жумаев Яккасарой туманида истиқомат қилиб келган. Бир куни қишлоқдоши Қўчқоров телефон орқали Тошкентга келиши зарурлигини айтиб, бир неча кун меҳмон қилишини сўраган. Жумаев рози бўлган. Лекин меҳмон йўлдалигида Акром исмли қўшниси Жумаевни ўз дўстининг пулларини ўмаришга кўндирган.
Режага кўра, учрашув учун келишилган жойга Ойбек исмли киши Қўчқоровни “кутиб олиб”, пулларини ва телефонини ўғирлаб қочган.
Жумаев ўзини билмаганга олиб, дўсти билан ўғрини “қидирган” ҳам, лекин ахийри Қўчқоров унинг телефондаги суҳбатларидан гумонсирай бошлаган. Шунда у туман ИИБга мурожаат қилган.
Сўроқ давомида Жумаев айбини тан олган.
Суриштирув ишлари давом этмоқда.