АҚШ ҳарбийлари ИШИД жаллоди, Жиҳодий Жон номи билан машҳур Муҳаммад Имвозийнинг авиазарбалар оқибатида ҳалок бўлганига 99 фоизга амин. Бу ҳақда Fox News телеканали хабар бермоқда.

Илгарироқ Пентагон матбуот котиби Питер Кук Раққа шаҳрига дрон орқали авиазарба берилганини хабар қилган эди.
“Бизнинг унинг ўлдирилганига 99 фоизига аминмиз”, - таъкидлади Кук. Унинг сўзларига қараганда, дрон Жиҳодий Жонни кун давомида кузатган ҳамда у уйидан чиқиб, машинага ўтирган пайтда зарба берган.

Жиҳодий Жон 2014 йил августида америкалик журналист Жеймс Фоулини қатл қилганидан сўнг оммага маълум бўлди. Март ойида ОАВ унинг талабалик анкетасидан топилган суратни чоп этди. Суратдан маълум бўлишича, у 1988 йилнинг 17 августида дунёга келган. Бундан ташқари, Имвозийнинг Вестминстер университетини тамомлагани маълум бўлди.