12 ноябрь куни кечаси Ливан пойтахти Байрут шаҳрида амалга оширилган терактлар туфайли ҳалок бўлганлар сони 43 нафарни ташкил қилмоқда. Ливан полицияси берган маълумотда айтилишича, теракт натижасида жароҳатланган 200 нафардан ортиқ киши шаҳардаги шифохоналарга олиб борилган.

12 ноябрь кунининг иккинчи ярмида Байрутдаги аҳоли гавжум бўлган икки ҳудудда террорчи-ҳудкушлар ўзларини портлатишди. Бу ҳудудларда асосан шиалар истиқомат қилишади.

Ливан ИИВ раҳбари Нуҳад Машнукнинг айтишича, шу куни жангарилар шаҳарнинг 4та жойида теракт амалга оширмоқчи бўлишган, портлашлардан бири туфайли учинчи нуқтага кетаётган террорчи ҳалок бўлган, тўртинчиси эса қочиб кетган.

Ушбу терактлар учун жавобгарликни ИШИД ўз зиммасига олган.

Қайд этилишича, портлашлар юз берган ҳудудда ИШИДнинг асосий рақибларидан бири "Ҳизбуллоҳ" кучли таъсирга эга ҳисобланади.