"Қирғизистонда ҳар бир тадбиркор ўз сармоясининг ишончли йўналтирилиши кафолатига эга бўлиши керак", дейди Қирғизистон бош вазири Темир Сариев ҳукумат йиғилишида.

Унинг айтишича, "бизнес жаннати" яратиш Вазирлар Маҳкамасининг асосий вазифаси ҳисобланади. У вазирликлар ҳам ташқи ҳам ички сармоядорлар учун жозибали бизнес шароитлари барпо қилиниши кераклигини таъкидлаган.

"Иш яхши кечиши учун яхши шароитлар мавжуд бўлиши керак", дейди вазир.

"Барча тартибга солиш ва назорат қилиш органлари аудит ва бизнес ҳисоботларини соддалаштириш учун ислоҳотлар ўтказиши лозим. Шахсий мулкка қонундан ташқари аралашув ҳолатлари қатъий жазоланиши таъминланиши керак. Бу вазифалар ижросини таъминлаш бош вазирнинг Иқтисод ва инвестиция масалалари бўйича ўринбосари Олег Панкратов зиммасига юклатилади. Сиз 2 ҳафта мобайнида хусусий мулк ва инвестицияларни ҳимоя қилишнинг самарали механизмини ишлаб чиқиб, таклиф киритишингиз керак", дейди Сариев.