Париждаги меҳмонхонага жойлашган Германия терма жамоаси футболчилари 13 ноябрь куни меҳмонхонада бомба бўлиши мумкинлиги ҳақида хабар пайдо бўлгач, эвакуация қилинди. Бу маълумот терма жамоа менежери Оливер Бирхофф томонидан тасдиқланган.

"Портлаш хавфи пайдо бўлди. Меҳмонхона ёпилди ва ундаги одамлар хавфсиз жойларга кўчирилди", дея маълумот берган Бирхофф Kölner Express нашрига.

Манбанинг ёзишича, германиялик футболчилар Парижнинг 16-округидаги "Молитор" меҳмонхонасида жойлашишганди. Бомба ҳақида хабар пайдо бўлгач, полиция етиб келиб, ҳудудда текширув ишлари олиб борган.

Кейинчалик бу маълумот ёлғонлиги аниқланган.

Футболчилар бошқа жойга олиб борилишган. Улар бугун Франция терма жамоасига қарши ўртоқлик учрашувида майдонга тушишлари керак.

"Меҳмонхонада бомба борлиги ҳақида маълумот пайдо бўлгач, бизни эвакуация қилишди. Ҳозир барчамиз хавфсиз жойдамиз. Озроқ теннис ҳам ўйнадик", дея ёзади терма жамоа аъзоларидан бири Сами Хедира.