Мутахассислар Гренландиядаги асосий музликлардан бири эришни бошлагани, бу музликнинг бутунлай эриши туфайли дунё океани сатҳи 50 см кўтарилиши мумкинлигидан огоҳлантиришди.

Тадқиқотчиларнинг айтишича, иқлим исиши туфайли Гренландиянинг бир қисми бўлган Zachariae Isstrom музлиги шиддат билан эримоқда.

Ундан янги айсберглар ажралиб чиқаётгани ва музликнинг эриши туфайли ҳар йили Атлантика океанига 5 миллиард тонна сув қўшилаётгани айтилган.

Гренландиянинг бошқа қисмларида ҳам музликларнинг йўқотилиши кузатилмоқда.

Рейтер нашрининг ёзишича, агар Гренландия бутунлай эриб тугаса, дунё океани сатҳи 6 метр баландлашади.

Шу ойнинг охирида Парижда бошланадиган БМТнинг иқлимий ўзгаришларга бағишланган 21-конференцияси (30 ноябрь-11 декабрь) давомида ушбу масалага ҳам эътибор қаратилиши кўзда тутилган.