Ироқ курдлари етакчиси Масуд Барзани Синжар шаҳри ИШИД жангарилари қўлидан озод этилганини маълум қилди, дея хабар бермоқда Reuters.

“Синжарнинг озод қилиниши Мосулни қайтариб олиш учун катта аҳамиятга эга бўлади”, - деди Барзани.

Аввалроқ курд ҳарбийлари кенг кўламли ҳарбий амалиёт жараёнида ИШИД жангарилар томонидан босиб олинган Ироқ шимолидаги Синжар шаҳрига кириб боргани маълум қилинган эди. Ҳужумларни АҚШ ва коалиция авиазарбалари қўллаб-қувватлаб турди.

Шаҳар жангарилар томонидан 2014 йил охирида босиб олинган эди. Қайд этилишича, Синжар ИШИД учун Ироқ ва Суриянинг Мосул ва Ракка шаҳарларини боғлаб турадиган стратегик аҳамиятга эга марра ҳисобланади.