Тожикистон-Покистон муносабатларининг ривожланиш истиқболлари 12 ноябрда Исломободда Тожикистон президенти Эмомали Раҳмоннинг Покистон бош вазири Навоз Шариф билан учрашувидаги музокараларда муҳокама қилинди.

Эмомали Раҳмон матбуот хизматининг маълум қилишича, Тожикистон президенти кенгайтирилган таркибдаги музокаралар давомида Покистон билан муносабатларнинг мустаҳкамланиши ва ҳамкорликнинг кенгайтирилиши Тожикистон ташқи сиёсатининг асосий йўналишларидан бири ҳисобланишини таъкидлаб ўтди. Раҳмон Покистоннинг Жанубий Осиё минтақаси ва ислом дунёсидаги геостратегик ҳолати ва имижига юқори баҳо берди ва Тожикистон учун бу давлат билан ҳамкорлик қилиш муҳимлигини айтди.

Музокаралар давомида сиёсий, иқтисодий, инвестицион, савдо, энергетика, мудофаа ҳамда илмий-техник ва маданий соҳалардаги ҳамкорликни ривожлантириш бўйича фикрлар алмашилди.

Икки давлат ўртасидаги 23 йиллик дипломатик муносабатлар давомида турли соҳаларда 40 дан кўпроқ икки томонлама ҳужжатлар имзолангани таъкидлаб ўтилди.

Тожикистон ва Покистон ўртасидаги савдо айланмаси 1998 йилдаги 18 млн доллардан 2014 йилда 89 млн долларгача етгани алоҳида мамнуният билан таъкидланди.

Автомобиль ва темир йўллар қурилиши, Покистоннинг Тожикистондаги энергетика лойиҳаларидаги иштироки, Тожикистон саноатига инвестиция киритиш ҳамкорликнинг устувор йўналишлари сифатида эътироф этилди.

Томонлар террорчилик ва экстремизмга қарши биргаликда курашиш лозимлигини айтиб ўтишди.

Раҳмон Навоз Шарифга Тожикистонга жавоб ташрифи билан келишни таклиф қилди ва унинг таклифи мамнуният билан қабул қилинди.