АҚШ президенти Барак Обама навбатдаги узоқ муддатли халқаро сафари пайтида бир қатор давлатлар етакчилари билан 8 та икки томонлама ва учта кўп томонлама учрашув ўтказади. Бу ҳақда Оқ уйда сафаролди матбуот анжуманида Обама ёрдамчилари Сюзан Райс ва Бен Родс маълум қилдилар.

14 ноябрда Обама Туркия, Филиппин ва Малайзияга халқаро саммитларда иштирок этиш учун жўнаб кетади. Сафар 22 ноябргача давом этади. Туркияда “катта йигирматалик”, Филиппинда Осиё-Тинч океани иқтисодий ҳамкорлиги ва Малайзияда АҚШ-АСЕАН (Жануби-Шарқий Осиё давлатлари уюшмаси) ва Шарқий Осиё саммитлари бўлиб ўтади.

Обама бу давлатларга сафари пайтида уларнинг етакчилари билан учрашади. Обама сафар чоғида Австралия ва Канаданинг янги бош вазирлари билан шахсан танишиш имкониятига эга бўлади. Бундан ташқари, Обама Япония, Сингапур ва Лаос етакчилари билан икки томонлама учрашувлар ўтказиши мўлжалланган. Обама ёрдамчиси Родснинг айтишича, Обама Лаос кейинги йилда АСЕАН ва Шарқий Осиё саммитида раислик қилиши сабабли ушбу мамлакат етакчиси билан учрашади.