Хитойнинг Ухань шаҳрида бўлиб ўтаётган 16 ёшгача бўлган қизлар ўртасидаги футбол бўйича Осиё чемпионати гуруҳ босқичининг учинчи тур ўйинларидан кейин Ўзбекистон терма жамоаси уйга қайтди.

“В” гуруҳидан ўрин олган Ўзбекистон U-16 аёллар терма жамоаси учинчи турда Хитой Тайпейга қарши майдонга тушиб, йирик — 3:0 ҳисобида ғалаба қозонди.

Голларни Мафутна Панжиева, Махлиё Назарқулова ҳамда Шахноза Қурбонова киритишган.

Баҳром Норсафаров бошчилигидаги жамоа мусобақанинг дастлабки ўйинида Японияга қарши майдонга тушиб, 4:0 ҳисобида мағлуб бўлганди. Ундан кейинги — КХДРга қарши ўйин ҳам худди шундай ҳисобдаги мағлубият билан тугаганди. Гуруҳ босқичининг сўнгги туридаги ғалабадан кейин Ўзбекистон 3 очко билан ўз гуруҳида 3-ўринни эгаллади ва мусобақадаги иштирокини якунлади.

"В" гуруҳдан Япония ҳамда Шимолий Корея терма жамоалари 7тадан очко жамғариб, ярим финалга йўл олди. Ярим финал йўлланмасини “А” гуруҳидан Хитой ҳамда Таиланд терма жамоалари ҳам қўлга киритди.