Ўзбекистон Республикаси Вазирлар Маҳкамасининг 2011 йил 18 ноябрдаги қарорига мувофиқ, жорий йилнинг 20 ноябридан 20 декабрига қадар мамлакатда Ёнғин хавфсизлиги ойлиги ўтказилади. Бу ҳақда ЎзА хабар бермоқда.

Ушбу ойликдан кўзланган асосий мақсад иқтисодиёт тармоқлари ва ижтимоий соҳа объэктлари, шунингдек, уй-жой фондини ёнғин хавфсизлиги талабларига мувофиқ ҳолга келтириш ҳамда ўта муҳим давлат аҳамиятига молик ёки ёнғин хавфи юқори бўлган объэктларда ёнғин хавфсизлигини мустаҳкамлаш бўйича комплекс чора-тадбирларни амалга оширишдан иборат.

Ўзбекистон Республикаси ИИВ Ёнғин хавфсизлиги бош бошқармасининг ушбу ойлик муносабати билан эълон қилинган мурожаатида тадбирда аҳоли иштирокига алоҳида урғу берилган. «Сизлардан ушбу тадбирда фаол иштирок этишингизни сўраймиз. Ёнғин хавфсизлиги қоидаларига қатъий риоя қилиб, Сиз нафақат ойликнинг фаол иштирокчисига айланасиз, балки бу билан давлат ва ўз шахсий мулкингизни, уй-жойингизни ёнғиндан асраган, шунингдек, яқинларингиз ва фарзандларингиз хавфсизлигини таъминлаган бўласиз», — дея таъкидланади мазкур мурожаатда.