Жиззах шаҳрида туғилган, ИШИД террорчи гуруҳи сафларига қўшилиб кетган Ҳуршид Мухторов Ўзбекистоннинг ҳуқуқ-тартибот органлари томонидан халқаро қидирувга берилди.

12news.uz ресурсининг тегишли органлар маълумотларига таяниб ёзишича, 35 ёшли фуқаро экстремистик пропаганда таъсирга тушиб, 2008 йил бошида Ўзбекистонни тарк этган. Дастлаб у Қозоғистонда яшаган, сўнг Туркияда 6 йил турган. 2014 йил ёзида Мухторов Сурияга ўтказилган ва ИШИД сафларига қўшилган.

Мухторов жангарилар томонида туриб Сурия ҳукумат қўшинларига қарши ҳарбий ҳаракатларда иштирок этган, шунингдек, интернет орқали Ўзбекистондаги конституцион тизимни ағдаришга ошкора тарғиб қилиб келган.
“Айни пайтда у халқаро қидирувга берилди”, - дейилади хабарномада.