Туркия президенти Ражаб Тойиб Эрдўған Анталияда бўлиб ўтадиган “катта йигирматалик” (G20) саммитининг асосий мавзуси террорчиликка қарши кураш масаласи бўлиши кераклигини айтди, деб хабар берди Reuters ахборот агентлиги.

G20 саммити одатда иқтисодий масалалар, Яқин Шарқдаги вазият ва жаҳон хавфсизлигига бағишланганига қарамасдан, Эрдўған давлатлар етакчилари биринчи навбатда Сурия ва Ироқдаги ихтилофни муҳокама қилишлари кераклигига ишончи комиллигини айтди.

“Ҳозир биз террорчиликка қарши фақат қуруқ гап билан курашиб бўлмаслик вазиятига келдик. Бу масаланинг ечимини олдинга қаторга олиб чиқиш керак”, деб таъкидламоқда Эрдўған.

G20 саммити 15-16 ноябрь кунлари Анталияда ўтказилади. Саммитга “катта йигирматалик” давлатлари етакчилари ва уларга ҳамроҳлик қилувчи делегациялар келади. Ҳаммаси бўлиб саммитда 13 мингга яқин киши иштирок этади.

Аввалроқ Франция президенти Париждаги терактлар туфайли саммитга ташрифини бекор қилгани маълум қилинганди.