Франция президенти Франсуа Олланд 14 ноябрга ўтар кечаси Париж шаҳрида амалга оширилган терактлар туфайли мамлакатда 3 кунлик мотам эълон қилди.

Олланднинг маълум қилишича, унинг фавқулодда ҳолат тўғрисидаги фармонига мувофиқ полиция ва армия сафарбар этилган.

Бироз олдинроқ, президент бу терактларда ИШИДни айблаб чиққанди.

Эслатиб ўтамиз, 13 ноябрь оқшомида Парижда давомли терактлар содир этилди.
Террорчилар аввалига Франция ва Германия ўртасидаги ўртоқлик учрашуви бўлиб ўтаётган «Стад де Франс» стадиони яқинида портлаш содир этди. Шундан сўнг, Сена дарёси бўйидаги бир қатор ресторанларда хўрандаларга қарата ўт очилди.

Энг асоратли воқеалар эса "Батлакан" театрида юз берди. Концерт вақтида бинога кириб келган жангарилар 4 томонга ўт сочиб, юз нафарга яқин кишини отиб ташлаб, кўплаб кишиларга жароҳат етказишди.

Сўнгги расмий маълумотларга кўра, терактлар оқибатида 128 киши ҳалок бўлган, 200 га яқин одам тан жароҳати олган.

ОАВларда эса ҳалок бўлганлар сони 150 нафар, жароҳатланганлар 250 нафарлиги айтилмоқда.