Франция ва Германия терма жамоалари ўртасидаги ўртоқлик учрашуви бўлиб ўтаётган «Стад де Франс» стадиони яқинида портлаш амалга оширилиши туфайли 3 киши ҳалок бўлган. Бу ҳақда Франция футбол федерацияси президенти Ноэль Ле Граэ Canal + телеканали эфири вақтида маълум қилди.

"Стадионга кириш дарвозаларидан бири олдида (J дарвозаси) портлаш содир бўлгач, 3 киши ҳалок бўлган ва яна бир неча киши жароҳатланган", дейди Ле Граэ.

Бу вақтда ўйинни томоша қилиш мақсадида келган Франция президенти Франсуа Олланд ҳам стадион ичида эди. У ўйин якунланиши билан стадионни тарк этган.

Эслатиб ўтамиз, Парижда 13 ноябрь кечаси 6 тадан 7 тагача теракт амалга оширилган: 4 та ҳужумда одамларга қарата ўқ узилган, “Батаклан” концерт залида одамлар гаровга олинган, шаҳар четидаги “Стад де Франс” стадиони ёнида 3 та портлаш содир этилган.

Ушбу ҳужумлар учун жавобгарликни ИШИД террорчилик гуруҳи ўз зиммасига олган.