Франция пойтахти аҳолисига жума куни тунда Париж шаҳрида бўлиб ўтган қўпорувчилик ҳаракатларидан сўнг бир-бирига фаол кўмак бермоқда. Twitter микроблогларида терактлар содир бўлган ҳудудларда полиция тўсиқлари сабабли уйига қайта олмаётган, тунаш учун қўноққа мухтож кишиларга жойлар таклиф қилинди.

Париж таксичилари эса таксометрларни ўчирган ҳолда йўловчиларни уйларига бепул элтиб қўймоқда. Шаҳардаги йирик таксомотор компанияларидан ҳисобланган LNT хабарида шифохоналар учун таксилар зарурлиги айтилиб, барча ҳамкасблар кўмакка чақирилган.

Эслатиб ўтамиз, Парижда 13 ноябрь кечаси 6 тадан 7 тагача теракт амалга оширилган: 4 та ҳужумда одамларга қарата ўқ узилган, “Батаклан” концерт залида одамлар гаровга олинган, шаҳар четидаги “Стад де Франс” стадиони ёнида 3 та портлаш содир этилган. Ушбу ҳужумлар учун жавобгарликни ИШИД террорчилик гуруҳи ўз зиммасига олган.