ХХР ҳар икки давлат ҳудудида сайёҳлар оқимини кенгайтириш учун Россия билан визасиз тартибни жорий этишга уринмоқда, дея хабар қилди “Интерфакс” Хитой Ташқи ишлар вазирлигининг Европа ва Осиё мамлакатлари департаменти раҳбари Гуй Цунъю маълумотига асосланган ҳолда.

“Биз туризмдан Россия билан алоқаларни мустаҳкамлашнинг яна бир соҳаси сифатида фойдаланмоқчимиз. Сайёҳларни жалб этиш усулларидан бири — виза тартибини соддалаштиришдир”, — деди хитойлик дипломат.

Гуй Цунъюнинг қайд этишича, сўнгги йилларда РФ ва Хитой ўзаро сайёҳлар оқимини ошириш учун бир қатор одимларни ташлашди. Жумладан, беш кишидан иборат сайёҳлар гуруҳи учун виза тартибини бекор қилиш жорий этилган. Бироқ мазкур соддалаштирилган тизим ҳам Россияга саёҳат қилишни истаган хитойликларни қониқтираётгани йўқ.

Унинг маълумотларига кўра, сўнгги икки йилда Россияга ташриф буюрувчи хитойлик сайёҳлар оқими икки баробар ортиб, йилига 1,1 миллион нафарга етган. Бу рақам 5 миллион нафарга етган тақдирда, Россия иқтисодиёти 10 миллиард доллар атрофида даромад кўради. Чунки ҳар бир хитойлик ўртача 2 минг доллар сарфлайди.