Франция полицияси ўз расмий твиттери орқали Париж терактларини содир этганликда гумон қилинаётган террорчи суратини эълон қилди.

Қўшимча қилинишича, ушбу шахснинг исми Абдусалим Салоҳ бўлиб, у ўта хавфли жиноятчи ҳисобланади. Ҳуқуқни муҳофаза қилиш органлари у билан ҳеч қандай алоқага киришмасликни тавсия қилишган.

Бироз олдинроқ, полиция қочқинликда юрган террорчини қидираётгани хабар қилинганди.

Эслатиб ўтамиз, 14 ноябрга ўтар кечаси Франция пойтахти Париж шаҳрида ИШИД жангарилари томонидан давомли терактлар содир этилди. Охирги маълумотларга кўра, ушбу хунрезликлар натижасида 129 киши ҳалок бўлган, жароҳатланганлар сони 352 нафарни ташкил этади. Жароҳатланиб шифохонага ётқизилганларнинг 99 нафари оғир аҳволда қолмоқда.