Тошкент шаҳридаги “Умида-Лизинг” МЧЖда менежер лавозимида ишлаб келган Бекмурод Ҳакимов коррупцион жиноятларда айбланиб қўлга олинди. Бу ҳақда “Ҳуқуқ” нашри хабар бермоқда.
Айтилишича, МЧЖ ўтган йили “Сабина-савдо” фирмаси билан шартнома тузиб, унга кўра, лизинг компанияси иккинчи томонга Nexiа автомобилини олиб бериши лозим эди.

Белгиланган тартибда “Сабина-савдо” МЧЖ автомашинанинг ярим пулини тўлаган. Қолгани эса лизинг шартномаси асосида тўланиши лозим эди. Автосалондан машина олиб келинса ҳам, уни эгасига бериш муддати чўзилиб кетган, негаки автотранспортни айнан Б. Ҳакимов шаҳар ИИББнинг ЙҲХБдан ўтказиб, кейин эгасига топшириши керак эди.

Иккинчи томон раҳбари Носиржон Маматов унга учраб, муаммонинг сабабини сўраганида, Ҳакимов ишни тезроқ битириш учун мижозидан минг доллар сўраган.

Маматов СВОЖЖДЛҚК департаментининг шаҳар бошқармасига ариза билан мурожаат қилган. Унга асосан департамент ходимлари томонидан ўтказилган тадбирда Б. Ҳакимов ўзи талаб қилган пулни олаётган вақтда ашёвий далил билан ушланган.