2015 йилнинг сентябрь ойида Москва шаҳридаги Ўзбек миллий – маданий автономияси ва “ЛексМобайл” юридик фирмаси ҳамкорликда янги ижтимоий лойиҳа – “MIGRANT” мобил дастури ишга туширилган эди.

Ҳозирги пайтда дастур фойдаланувчилари Россияга кириш учун таъқиқ бор-йўқлигини аниқлаш, патент ва ишга рухсатноманинг ҳақиқий эканини текширишлари мумкин. Мазкур хизмат Россия ва ундан ташқарида меҳнат қилаётган меҳнат муҳожирларига рус, ўзбек ва тожик тилларида хизмат кўрсатади. Шу кунгача дастурдан фойдаланаётганлар сони 7000 дан ошиб кетди.

“MIGRANT” дастури меҳнат муҳожирларининг ҳуқуқий хабардорлигини ва саводхонлигини ошириши эътироф этилмоқда. Шунингдек, дастур меҳнат муҳожирлари учун оддий ягона интерфейс орқали ижро ҳокимиятига қарашли турли органлар кўрсатаётган хизматлардан фойдаланишга имкон беради.

“ЛексМобайл” ходимларининг сўзларига кўра, дастурга фойдаланувчилар эҳтиёж ва талабларидан келиб чиққан ҳолда кўпгина фойдали ва қизиқарли қўшимчалар киритиш режалаштирилган. Мобил дастури орқали яқин келажакда Федерал солиқ хизмати сайтига кирмасдан патент учун тўлов квитанциясини шакллаштириш, тўлов ўтказиш, шахсий ИНН ни аниқлаш ва бошқа ишларни амалга ошириш мумкин. Дастурга “эслатиш” функциясини киритилгач, у муҳожирни қачон патент учун тўлов ўтказиши лозимлиги, регистрация муддати қачон тугаши ва мамлакатни тарк этиши зарурлиги ҳақида ўз вақтида огоҳлантириб боради.

Дастур Android ва IOS платформаларида ишлайди. Уни кўчириб олмоқчи бўлганлар “Play Маркет” ёки “App Store” мобил дастурлар дўконларидан “Мигрант” ёки “Migrant” сўзларини киритиб топишлари мумкин.