Ўзбек тилига давлат тили мақоми берилганининг 26 йиллиги муносабати билан Чикаго ўзбек-америка ассоциацияси томонидан "Олтин қалам" номли номли ўзбек тилидаги иншолар танлови ўтказилди.

Кун.уз нашрига маълум қилишларича, иншо учун 1 ой муҳлат берилган эди. Шу вақт мобайнида бир қанча иншолар келиб тушган. Ушбу иншолар орасидан малакали она тили ўқитувчилари томонидан 3та энг яхши ёзилган иншолар ажратиб олинган. Иншо муаллифлари аниқланган ва тақдирланган.

Иншо мавзулари қуйидагича эди:
"Ўзбек тили-она тилим"
"Ўзбекистон ватаним менинг"
"Мен ўзбекман"

Танловда биринчи ўринни пенсилваниялик Ҳасанжон Абдураҳимов, 2-ўринни Чикаго Ўзбек мактаби ўқувчиси Севара Қодирова, 3-ўринни пенсилваниялик Муслима Мирзаханова эгаллаган.

Ғолибга Amazon Kindle Paperwhite электрон китоби, фахрий ёрлиқ ҳамда Олтин қалам рамзи туширилган кийим юборилган.

Иккинчи ўрин эгасига 70 долларлик Barnes&Noble китоб дўконининг совға картаси, фахрий ёрлиқ ҳамда олтин қалам рамзи туширилган кийим юборилган.

Учинчи ўрин соҳибига ҳам 50 долларлик Barnes&Noble китоб дўконининг совға картаси, фахрий ёрлиқ ва олтин қалам рамзи туширилган кийим юборилган.

Чикаго ўзбек-америка ассоциацияси президенти Олим Шариов барча қатнашчиларга ҳамда шу танловни уюштирган борд аъзоларига барча чикаголиклар номидан ташаккур айтган ҳамда ўзбек тилини асраш ҳар бир ўзбекнинг вазифаси эканлигини эслатиб ўтган.