Голливуднинг машҳур актёри Арнольд Шварценеггер браконьерлик муаммосига эътиборни қаратиш мақсадида фил қозиқ тишини портлатиб юборди. Бу акс этган ролик интернетда пайдо бўлди, деб хабар бермоқда Channel24 телеканали.

Видеода актёр танк фонида қўлида фил қозиқ тиши билан “унга талабдан умуман воз кечиш кераклигини” айтиб, томошабинларга бу суякларни олиш учун ҳар куни 96 фил ўлдирилишини тушунтирмоқда. Шундан кейин фил қозиқ тиши бир уюм сомон устида портлатиб юборилди.

Роликни яратиш ташаббусчилари сифатида АҚШ ёввойи табиатини муҳофаза қилиш жамияти чиқди. Фил қозиқ тиши Лос-Анжелес ҳайвонот боғи томондан берилди.

Channel24’нинг таъкидлашича, охирги вақтда 8 та давлатда, жумладан Хитой, АҚШ ва бир қатор Африка давлатларида ноқонуний олинган 42 тонна фил суяги намойишкорона йўқ қилинган.

2015 йилнинг октябрида Зимбабведаги Хванге миллий боғида браконьерлар томонидан фил қозиқ тиши олиш мақсадида цианид заҳари билан заҳарланган 22 та фил жасади топилган. Бунгача бир неча кун аввал Хараре халқаро аэропортида мамлакат ҳуқуқ-тартибот муассасалари Сингапурга жўнатилиши керак бўлган 173 килограмм фил суягини мусодара қилишган.

Африканинг кўпгина давлатларида айни пайтда фил тишини сотишга тўлиқ ёки қисман тақиқлов амал қилади.