Франция бош вазири Мануэль Вальснинг RTL телеканали эфирида маълум қилишича, ИШИД томонидан Европада янги терактлар содир этилиши хавфи мавжуд.

Унинг сўзларига кўра, жангарилар "Франция ва Европанинг бошқа мамлакатларида навбатдаги терактларнинг амалга оширмоқчи".

Вазирнинг қайд этишича, Париждаги давомли терактлар ўтказиш режаси Сурия ҳудудида ишлаб чиқилганди.

"Бизнинг авлодимиз узоқ вақтгача террор хуружи таҳдиди остида яшашга мажбур. Биз доимо огоҳликда туришимиз керак", дейди Вальс.

Вальснинг тасдиқлашига кўра, бутун мамлакат бўйлаб аксилтеррор амалиётлари ўтказилиши давом эттирилади.

Бироз олдинроқ, Париж терактлари суриялик Абдулҳамид Абауд томонидан ташкил қилингани ҳақида хабар берилганди.

Эслатиб ўтамиз, 14 ноябрга ўтар кечаси Франция пойтахти Париж шаҳрида ИШИД жангарилари томонидан давомли терактлар содир этилди. Охирги маълумотларга кўра, ушбу хунрезликлар натижасида 129 киши ҳалок бўлган, жароҳатланганлар сони 352 нафарни ташкил этади. Жароҳатланиб шифохонага ётқизилганларнинг 99 нафари оғир аҳволда қолмоқда.