Қирғизистон ҳуқуқни муҳофаза қилиш тузилмалари Франциядаги қўпорувчилик ҳаракатлари содир этилгани муносабати билан хавфсизлик чораларини кучайтиришга киришди. Бу ҳақда мамлакат ИИВ вакили ТАСС мухбирига маълум қилди.

“Ходимларимиз стратегик муҳим саналган барча объектлар ва одамлар кўп тўпланадиган жойларни ҳимоя қилишни ўз қўлига олган, - деди вазирлик вакили. – Бундан ташқари, тезкор қидирув йўналишида олиб борилаётган ишлар ҳам фаоллашган”. Республика аҳоли пунктлари, айниқса пойтахтда милиция ходимларидан иборат мобиль гуруҳларнинг патрулликлари сони ортган.

14 ноябрь куни қирғиз ҳукумати раҳбари Темир Сариев ИИВ ва миллий хавфсизлик давлат қўмитаси раҳбарлари иштирокида йиғилиш ўтказиб, Франциядаги терактлар муносабати билан мамлакатда хавфсизлик чораларини кучайтириш, доимий равишда профилактика ўтказиш тўғрисида кўрсатмалар берган.