Франция полицияси Париждаги воқеалардан кейин мамлакат бўйлаб террорчиликка алоқадор бўлиши мумкин шахсларни аниқлаш ва қўлга олиш бўйича кенг кўламли амалиётлар ўтказишни бошлади. Бу ҳақда Guardian нашри хабар тарқатган.

Маълум қилинишича, фаол ҳаракатлар Тулуза, Гренобль ва Сант-Калаис шаҳарларида олиб борилмоқда.

Охирги хабарларда айтилишича, Гренобль шаҳрида бир неча гумондор қўлга олинган. Уларда ўт очар қуроллар борлиги аниқланган.

Қайд этиш керакки, Париждаги терактларга жавобан 16 ноябрга ўтар кечаси Суриянинг Роққа шаҳрида ИШИД базаларига Франция Ҳарбий ҳаво кучлари самолётлари томонидан ҳаво зарбалари берилди.

Эслатиб ўтамиз, 14 ноябрга ўтар кечаси Франция пойтахти Париж шаҳрида ИШИД жангарилари томонидан давомли терактлар содир этилди. Охирги маълумотларга кўра, ушбу хунрезликлар натижасида 132 киши ҳалок бўлган, жароҳатланганлар сони 349 нафарни ташкил этади. Жароҳатланиб шифохонага ётқизилганларнинг 96 нафари оғир аҳволда қолмоқда.