Марокашнинг Касабланка шаҳрида самбо бўйича жаҳон чемпионати якунланди.

Йилнинг сўнгги мусобақасида Ўзбекистон терма жамоаси ҳам тўлиқ таркиб билан иштирок этди.

Жаҳон чемпионатининг илк куни ўзбекистонлик самбочилар терма жамоа ҳисобига 1та олтин ва 3та бронза медалини тақдим этишганди.

Жанговор самбо бўйича 74 кг вазн тоифасида ўтказилган баҳсларда Истам Қудратов барча рақибларини мағлубиятга учратиб, икки карра жаҳон чемпиони номига сазовор бўлганди. Шунингдек, 52 кг вазн тоифасидаги Саттор Эргашев, 69 кг вазндаги Сарбон Эрназаров ҳамда 100 кг вазн тоифасидаги Исломжон Азимов жаҳон чемпионатининг бронза медалларини қўлга киритишган эди.

Жаҳон чемпионатининг кейинги кунларида эса терма жамоа ҳисобидаги медаллар сони яна учтага кўпайди. Жанговор самбо баҳсларининг 80 кг вазн тоифасида курашган Санжар Неъматов, 52 кг вазндаги Давлат Ҳамроев ҳамда Раҳматжон Аҳмедов бронза медалларига сазовор бўлишди.

Шу тариқа, 7та медал олган Ўзбекистон терма жамоаси жами 74 жамоа иштирок этган турнирда России (3та олтин, 4та кумуш ва 7та бронза), Қозоғистон (3, 3, 4), Украина (2, 4, 8), Беларусь (2, 2, 9), Грузия (2, 2, 5) ва Болгария (2, 2, 2) терма жамоаларидан кейин 7-ўринни эгаллади.