Туркия ҳукумати 2014 ва 2015 йилларда икки маротаба француз томонига Париждаги террористик ҳужумларнинг тахминий иштирокчиларидан бири тўғрисидаги маълумотларни тақдим этган, дея хабар бермоқда Reuters агентлиги юқори лавозимли турк амалдорига асосланган ҳолда.

Агентлик суҳбатдошининг хабар қилишича, гумондор шахс 2013 йилда Туркияга келган, бироқ унинг чиқиб кетгани тўғрисидаги маълумотлар турк томонида мавжуд эмас. Ахборот манбаси сўзларига кўра, Париждаги терактлардан сўнг Туркия Франциядан гумондорлар тўғрисида маълумотлар тақдим этишини сўраб мурожаат қилган.

Эслатиб ўтамиз, 13 ноябрь куни тунда Париж шаҳрида туркум террористик ҳужумлари содир этилган эди. Жароҳат олганлар сони 352 нафарни ташкил этиб, улардан 99 нафарининг аҳволи ўта оғир. Франциядаги қўпорувчиликлар хавфсизлик ва терроризм масаласини яна бир бор дунё сиёсатининг кун тартибига олиб чиқди.