Парижда содир бўлган терактларга қарамай, АҚШ президенти Барак Обама ўзининг қочқинларга ёрдам кўрсатиш режасини ўзгартирмайди. Бу ҳақда Washington Examiner нашри ёзмоқда.

Қўлга олинган террорчилардан бири Европага қочқин мақомида ўтиб олгани хабар қилинган эди. Шунга қарамай, АҚШ президентининг миллий хавфсизлик бўйича ўринбосари Бен Родс мамлакат ҳалигача ўз ҳудудида 10 минг қочқинни қабул қилишга тайёрлигини айтди. Париждаги терактлардан сўнг бу қарор америкалик сиёсатчилар томонидан кескин танқид остига олинган эди.

“Бизда қочқинларни текширишнинг ўта ишончли жараёнлари ишлайди, - деди Родс Fox каналига берган интервьюсида. – Бунинг устида разведка хизматлари, террорчиликка қарши кураш бўйича миллий марказ ишлайди. Биз, шунингдек, узоқ сўроқлар ўтказиб, тақдим этилган барча ахборотни текширамиз”.