АҚШ Францияга авиазарбалар самарадорлигини ошириш мақсадида Сурия ва Ироқдаги ИШИД марралари тўғрисидаги янада кўпроқ маълумотлар тақдим этишни бошлади. Бу ҳақда The Wall Street Journal хабар бермоқда.

Нашр ахборот манбалари хабарига кўра, АҚШ Франция билан разведка маълумотларини алмашиш ҳажмини кенгайтириб, жангариларга ҳаводан зарба беришда нишонларни тўғри белгилаши учун унга батафсил маълумотлар тақдим этиш жараёнини тезлаштиришга келишиб олди. Шу йўл билан Қўшма Штатлар Парижнинг Сурия ва Ироқдаги ИШИДга эҳтимолий жавоб ҳужумларини амалга оширишга ёрдам кўрсатишни мақсад қилган.

АҚШ мудофаа маҳкамасидаги ахборот манбаси Пентагон раҳбари Эштон Картер ИШИД бўйича разведка маълумотларини Францияга етказишдаги чекловларни юмшатиш тарафдори бўлиб чиққанини қайд этди.
Бундан аввалроқ эса Франция ҲҲК Париж терактларидан сўнг биринчи марта Сурияда ИШИД марраларига зарбалар бергани хабар қилинган эди.